BÓKF3IF05 - Bókfærsla - Innflutningur og fyrirtæki

Viðfangsefni: Dagbók, T-reikningar, reikningsjöfnuður, millifærslur, uppgjör.

Lýsing: Gert er ráð fyrir að nemendur sem hefja nám í þessum áfanga hafi fullt vald á bókhaldshringrásinni, geti hafið bókhald og lokað því samkvæmt reglum tvíhliða bókhalds. Þessi kunnátta er dýpkuð verulega meðal annars með erfiðari færslum. Farið yfir bókun á helstu reikningum fyrirtækja; notkun fyrningareikninga við afskriftir eigna, bókun hluta- og skuldabréfa og notkun affallareiknings. Einnig er farið yfir bókanir sem varða innflutning; tollafgreiðslu, greiðslu virðisaukaskatts í tolli, kostnað og fyrirkomulag við geymslu á vörum í tollvörugeymslu. Uppgjörsfærslum er haldið áfram í gegnum reikningsjöfnuð. Farið er yfir bókanir í sambandi við stofnun og slit fyrirtækja, breytingar á réttarformi, samruna og fjárhagsleg endurskipulagningu fyrirtækja.

Forkröfur: BÓKF2DR05

Þekkingarviðmið: Nemandi skal hafa öðlast þekkingu og skilning á:

• helstu innflutningsskjölum vegna tollafgreiðslu og greiðslu virðisaukaskatts í tolli
• lögum um toll og virðisaukaskatt af innflutningi
• færslum vegna innflutnings á vöru
• gengisbreytingum vegna erlendra viðskiptaskulda og/eða viðskiptakrafna
• kostnaði og fyrirkomulagi við geymslu á vöru í tollvörugeymslu
  
  

Leikniviðmið: Nemandi skal hafa öðlast leikni í að:

• reikna og bóka verðbætur, vexti og afborganir af óverðtryggðum og verðtryggðum skuldabréfum
• reikna og bóka færslur sem tengjast hlutabréfaeign, arði, gengisbreytingum, jöfnunarhlutabréfum o.s.frv.
• bóka færslur sem varða stofnun og slit félaga
• bóka færslur sem varða breytingu á réttarformi fyrirtækja, samruna og fjárhagslega endurskipulagningu þeirra
• meðhöndla mismunandi virðisaukaskattsþrep í bókhaldi
  
  

Hæfniviðmið: Nemandi skal geta hagnýtt þá almennu þekkingu og leikni sem hann hefur aflað sér til að:

• hefja bókhald með hliðsjón af fyrirliggjandi efnahagsreikningi eða stofnun fyrirtækis
• leysa af hendi lagfæringar í bókhaldi með hliðsjón af athugasemdum
• setja upp einfaldan rekstrar- og efnahagsreikning í lok reikningstímabils að teknu tilliti til athugasemda og lokafærslna
• færa tvíhliða bókhald fyrir lítinn og einfaldan atvinnurekstur