Jafnréttisstefna

Telji starfsfólk sig verða fyrir kynferðislegri eða kynbundinni áreitni og/eða ofbeldi má leita til skólameistara, trúnaðarmanna stéttarfélaga innan skólans eða jafnréttisfulltrúa skólans eins og fram kemur í starfsmannastefnu. Í framhaldi er unnið í málinu í samráði við þann sem telur á sér brotið. Haft er samband við aðila málsins og hvorum/hverjum aðila um sig gefinn kostur á að tjá sig um málsatvik. Leitað er sátta ef svo ber undir en málinu komið í lögformlegan farveg takist það ekki eða grunur leikur á að lögbrot hafi verið framið. Á öllum stigum skal tryggt að aðilum máls sé veittur viðhlítandi stuðningur, vilji þeir á annað borð þiggja slíkt.

Fræðslu um kynferðislega áreitni og kynbundna áreitni og ofbeldi skal auka, til að stuðla að því að allt starfsfólk verði meðvitað um málefnið, geti greint slíkt atferli og brugðist við því ef svo ber undir, sbr 22. gr. jafnréttislaga sem segir að yfirmenn stofnana og félagasamtaka skulu gera sérstakar ráðstafanir til að koma í veg fyrir að starfsfólk, nemar og skjólstæðingar verði fyrir kynbundnu ofbeldi, kynbundinni áreitni eða kynferðislegri áreitni á vinnustað, stofnun, í félagsstarfi eða skólum.

Samræming fjölskyldu- og atvinnulífs

Jafnréttissjónarmið og leiðir til að vinna að jafnri stöðu kynjanna verða að vera virkur þáttur í starfsmannastefnu skólans. Í starfsmannastefnunni skal:

●taka mið af jafnrétti þegar fjallað er um líðan starfsfólks á vinnustað og starfsanda.

●vera ljóst hvernig starfsfólki er gert kleift að samræma starfsskyldur sínar og skyldur gagnvart fjölskyldu með sveigjanlegum vinnutíma, hlutastörfum eða annarri vinnuhagræðingu, eftir því sem við verður komið.

Jafnréttisáætlun og starfsmannastefna skólans skulu vera samhljóma í þeim atriðum sem varða jafnréttismál.

II. hluti: Skólinn sem menntastofnun

Leggja skal áherslu á jafnréttissjónarmið í allri kennslu:

Allt starfsfólk skólans skal ávallt halda vöku sinni í jafnréttismálum sem og gæta að orðræðu í kennslustundum og þar sem því er viðkomið innan skólans. Jafnréttismál varða alla, bæði nemendur og starfsfólk og því verða tengsl jafnréttisnefndar skólans og jafnréttisnefndar nemenda styrkt eftir föngum, enda mikilvægt er að í öllu skólastarfi, jafnt í kennslustundum sem í öllum samskiptum, séu ákvæði jafnréttislaga höfð að leiðarljósi. Jafnframt er, eins og segir í aðalnámskrá framhaldsskólanna 2011, 2. útgáfa 2015 (bls 19.):

Mikilvægt að draga fram að ýmsir búa við margþætta mismunun þegar fleiri slíkir þættir tvinnast saman, til dæmis kyn og fötlun, kynhneigð og þjóðerni, aldur og búseta. Í þessu skyni er eðlilegt að nýta sér í skólastarfinu þekkingu sem nýjar fræðigreinar, svo sem kynjafræði, hinseginfræði, fjölmenningarfræði og fötlunarfræði, hafa vakið athygli á. Undir jafnréttismenntun fellur m.a. nám um kyn og kynhneigð. Með grunnþættinum jafnrétti er einnig lögð áhersla á að fram fari nám um menningu, þjóðerni, tungumál, trúarbrögð og lífsskoðanir.

Kennsla skal vera jafnréttismiðuð sem meðal annars felur í sér að kennarar beita sér samkvæmt eftirfarandi viðmiðum eins og kostur er, m.a. á eftirfarandi hátt:

●Kennsluaðferðir eru fjölbreyttar.

●Haft er í huga að kynin hafa oft og tíðum ólík áhugamál og ólíka lífsreynslu.

●Í námsgreinum, þar sem einu kyni gengur almennt betur en öðrum, eru markvisst notaðar aðferðir og efni til að hvetja alla nemendur til dáða.

●Fjallað er um námsefnið frá ýmsum sjónarhornum og ólíkar heimildir notaðar.

●Þess er gætt að vitna í sérfræðinga af öllum kynjum eftir því sem tök eru á.

●Kennarar gæta óhlutdrægni bæði hvað varðar hegðun og námsefni og benda nemendum á leiðir til að koma auga á og vinna gegn misrétti.

●Kennarar vinna gegn hvers kyns hatursorðræðu og fordómum í kennslustofum.

●Starfsfólk er til fyrirmyndar um jafnréttismiðaða framkomu og gera ekki greinarmun á kynjum í framkomu sinni og í kennslu.

●Starfsfólk nýti tækifæri til, ef aðstæður koma upp, að kenna nemendum að greina ólíkar aðstæður sem geta leitt til mismunar á jafnrétti kynja.

Fræðsla til handa nemendum:

Nemendur skulu fá fræðslu um jafnréttismál. Í þeirri fræðslu skal leggja áherslu á styrkleika allra kynja, skyldur og réttindi. Mikilvægt er að nemendur af öllum kynjum komi fram fyrir hönd skólans og nemendur séu meðvitaðir um gildi jafnræðis kynjanna í stjórnum, ráðum og annarri starfsemi nemendafélagsins. Þá er mikilvægt að nemendafélagið vinni að félags-, hagsmuna- og velferðarmálum allra nemenda og að fulltrúar nemendafélagsins séu ávallt meðvitaðir um þau atriði er tengjast m.a. jafnrétti og stefnu skólans. Þá er einnig mikilvægt að allir nemendur skólans hafi jöfn tækifæri á sækja viðburði á vegum skólans, sbr. aðgengi, fjölbreytni og auglýsingar.

Kynbundið ofbeldi, kynbundin áreitni og kynferðisleg áreitni – hatursorðræða og/eða móðgandi ummæli

Kynferðisleg áreitni er ekki liðin innan Flensborgarskólans.

Allir nemendur eiga rétt á því að komið sé fram við það af virðingu og að þeir sæti hvorki kynferðislegri né kynbundinni áreitni eða ofbeldi. Hatursorðræða og/eða móðgandi ummæli/hegðun sem tengist litarhætti, kynhneigð, þjóðernisuppruna, fötlun o.fl., grefur undan sjálfsvirðingu þess sem fyrir henni verður og hefur oft það að markmiði að styrkja neikvæðar staðalmyndir um viðkomandi minnihlutahóp.

Telji nemandi að brotið hafi verið gegn honum eða öðrum nemendum í Flensborgarskólanum skal hann leita til námsráðgjafa, umsjónarkennara eða aðstoðarskólameistara sem í samráði við viðkomandi finna hverju máli farveg. Vegna nemenda undir 18 ára aldri skal ávallt og án tafar haft samband við foreldra og/eða forsjáraðila þeirra. Í framhaldi er unnið í málinu í samráði við þann sem telur á sér brotið og eftir atvikum foreldra og/eða forsjáraðila hans. Haft er samband við aðila málsins og hvorum/hverjum aðila um sig gefinn kostur á að tjá sig um málsatvik. Leitað er sátta ef svo ber undir en málinu komið í lögformlegan farveg takist það ekki eða grunur leikur á að lögbrot hafi verið framið. Þá skal tafarlaust gera nemendaverndarráði viðvart. Á öllum stigum skal tryggt að aðilum máls sé veittur viðhlítandi stuðningur, vilji þeir á annað borð þiggja slíkt.

Aðgerðaáætlun 2023-2026

Aðgerðaáætlun Flensborgarskólans miðar meðal annars að því að auka almenna vitund fyrir jafnréttismálum, tryggja jafnrétti í öllu starfi skólans og koma í veg fyrir hvers konar mismunun. Hún á einnig að auka almenna ánægju bæði starfsfólks og nemenda og stuðla að bættum starfsanda og menningu skólans. Aðgerðaáætlunin er unnin í samræmi við lög nr. 150/2020 um jafna stöðu og jafnan rétt kynjanna og einnig í samræmi við Aðalnámskrá framhaldsskólanna frá 2011 2. útgáfa 2015 en þar er lögð áhersla á að starfshættir skólanna skuli mótast af umburðarlyndi og jafnrétti, lýðræðislegu samstarfi og ábyrgð.

Ætlunin er að:

●Huga enn betur að fræðslu um jafnréttismál innan Hámarks, umsjónar- og lífsleikniskennslu skólans. Þar næst til allra nemenda skólans ogþví mikilvægt að fá öfluga fræðslu og umræðu um jafnréttismál inn í hópana og þannig hlúa að jákvæðri skólamenningu og viðhorfi nemenda.

●Bjóða áfram upp á grunnáfanga í kynjafræði. Þar skal meðal annars leggja áherslu á kynja- og jafnréttisfræðslu, sögu jafnréttisbaráttunnar og fleira. Einnig er kenndur áfangi í sögu þar sem áhersla er lögð á kvennasögu.

●Þá er hvatt til að jafnréttismál séu ávörpuð í sem flestum áföngum og kennarar hvattir til að skoða námsárangur kynjanna.

●Efla samstarf milli jafnréttisnefndar starfsfólks og jafnréttisráðs nemendafélagsins.

●Halda skal málþing/fyrirlestur/örfyrirlestra/ þemadag á hverju skólaári þar sem jafnréttismál eru til umfjöllunar.

●Jafnréttisfulltrúi fer inn í valda nemendahópa til að hvetja til virkrar þátttöku allra nemenda í félagsstarfi innan skólans og vekja þar með nemendur til meðvitundar um gildi þess að bæði kynin komi fram fyrir hönd skólans.

●Að helstu áherslur heimsmarkmiða Sameinuðu þjóðanna gæti í öllum kenndum áföngum við skólann.

●Vinna áfram markvisst gegn kynbundnu ofbeldi með því að auka fræðslu jafnt til starfsfólks og nemenda.

●Viðhalda jafnlaunavottunarkerfi skólans

●Að viðbragðsáætlun skólans við kynferðis- og/eða kynbundnu áreitni og ofbeldi sé öllum sýnileg.

Útgefið í desember 2023

[1] Að gerð þessarar jafnréttisáætlunar kom jafnréttisjafnnefnd sem kosin var í skólafundi í ágúst 2023. Í henni sátu Atli Freyr Guðmundsson, Áslaug Þórðardóttir, Ásbjörn Friðriksson, Elín Guðmundsdóttir. Jafnréttisfulltrúi var Borghildur Sverrisdóttir.