Sigur í Landskeppni í efnafræði!

Bergur Fáfnir (t.v. á mynd) og Daði Þór (t.h. á mynd) mega vera stoltir af sínum árangri

Flensborgarskólinn átti tvo þátttakendur í úrslitum Landskeppninnar í efnafræði árið 2025, sem fram fór á dögunum. Þeir Daði Þór Friðriksson og Bergur Fáfnir Bjarnason stóðu sig einstaklega vel í almennu keppninni í febrúar og komust báðir áfram í úrslit. Þar endaði Daði Þór í 10. sæti en Bergur Fáfnir gerði sér lítið fyrir og sigraði keppnina. Þetta er í fyrsta sinn í sögu Flensborgarskólans sem við eigum sigurvegara í Landskeppninni í efnafræði, sannarlega glæsilegur árangur það. 

Þetta þýðir að Bergur Fáfnir verður í Ólympíuliði Íslands í efnafræði sem æfir stíft í júní og júlí fyrir keppnir sumarsins. Liðið mun fyrst taka þátt í Norrænu Ólympíukeppninni í efnafræði sem fram fer í Gautaborg og heldur síðan til Dubai til að taka þátt í Alþjóðlegu Ólympíukeppninni. Báðar keppnirnar fara fram í júlí.

Flensborgarskólinn óskar þeim Daða Þór og Bergi Fáfni til hamingju með þennan sérlega glæsilega árangur.